Umabot hanggang baywang ang bahang naranasan sa ilang bahagi ng Sta. Maria, Bulacan matapos ang tuloy-tuloy na pag-ulan kahapon.

Halos pitong oras na nakababad sa baha ang mga residente ng Barangay Tumana sa nasabing lungsod pero hindi sila umalis sa kanilang mga bahay. 

• Basahin:Bulacan, binaha ang ilang bahagi dahil sa malakas na ulan

Ang iba, lumusong sa baha para isalba ang mga inanod na damit.

Sanay na raw kasi ang mga residente sa baha lalo't madalas umapaw ang katabing ilog doon. 

Pero nag-aalala pa rin ang ilang residente sa sakit na maaaring idulot ng maruming tubig.

Inirereklamo nila ang drainage system sa kanilang lugar na nagiging sanhi umano ng pagbaha.

Dahil dito, nanawagan sila sa lokal na pamahalaan na ayusin na ang kanilang drainage system para maiwasan na ang problema sa baha.

Wala pang tugon kaugnay nito ang lokal na pamahalaan.

Nang humupa naman ang baha, mistulang nasa pista ang mga taga-Tumana na nagsama-sama sa ilog para manghuli ng tilapia.

--Ulat ni Angel Movido, ABS-CBN News